दोहावली :: इश्क ::
ब्यूटी खन इनकम समझ
पार्लर इनकम टैक्स
का्ल तन मन धन खन नाहन
तबै त क्वै काॅम्प्लेक्स
उन एस्सै छन उनूंकी
आदत मैं यू टर्न
मुखा साम्न तारीफ और
पच्छा चुगली कर्न
लोग बतूनान इश्क मैं
हुंछ ध्वा्ख दिन्य रिवाज
तुम ये स्यापा पुछ्ड़ मैं
खुट्ट न रा्ख मेहराज .. अधिक के लिए ‘DEVDAAR.COM’
विद्वानौ खन लांग्छ कि
उनूं नाहन पुर ज्ञान
अज्ञानी सोचनान कि
उन सब तिर जान्नान
एक भा्ण मैं पा्नि भर्न जस
नै हुन शिक्षण काज
दीपै ज्योति जलून जसि
पुज हुंछि यो मेहराज !
यदि जीवन मैं गल्ति क्वे
नै करि राखि एक बार
मतलब सिखनै कि तुमू ले
कोसिस नै करि यार
नै करि सक्न हमूं अलग
वर्ण धर्म और जात
पढ़ि लेखि बेर स्पष्ट भै
मानवता वा्लि बात
नई सदी वा्ल हम युवा
स्नेहिल दीप जलून
भेद बढ़ून्य अंध्यार खन
मिलिबेर दूर भजून
काईं लै के लै कर्न खन
रूनान जो तैयार
एक है अस्सल द्वी हुनान
द्वी है अस्सल चार
ये जीवन मैं हर समय
बस एत्ती रौ याद
समय हुंछ बहुत कीमती
समय न कर बरबाद
समय मैं लगै कीमती
उई पल असरदार
जब कि औंछ मस्तिष्क मैं
अस्सल कोई विचार
फिर कभ्भैं नै आ गुरू
समय जो निकलि जाल
जो पानि बगि गौ गाड़ मैं
बापिस कस्यैं आल
जि लै नसीहत मिलन्नै
झन भुल्या मेहराज
उस्वै काट्ला बाद मैं
जस तुम ब्वैला आज
वी बा्ट मैं कभ्भैं न हिट
जै मैं छन अपराध
पैंस लगै इज्जत लगै
सब्बै तिर बरबाद
द्वी नंबर वा्ल काम मैं
छन पचास बब्बाल
हान्ला ढुंग कच्यार मैं
छिट्ट मुखै मैं आल
सांच्ची श्रद्धा नाव और
बिस्वासै पतवार
लिबेर कतिप है ग्यान ये
भवसागर है पार
जीवन मैं सर्वत्र हुंछ
ग्रह नक्षत्रौ योग
तन व्यक्ति, मन कामना
धन संसारौ भोग
भगवानैल सब तिर दिरा
समय बुद्धि हा्त खुट्ट
भलिक्यां इस्तेमाल कर
आफी लाग्ल फिर लुट्ट
जंगल और बगैंच छन
परमेस्वरा समान
लिन के लै नै जिलै हुंछ
औरौ मैं बाणनान
सब्बौ दिंछ फल फूल और
कटि बेर लै दिंछ काठ
दान कि हुंछ और त्याग कि
रूख है सिख यो पाठ
एक फल मैं कति बीज छन
क्वे गनि संक्छ जरूर
छन कति फल एक बीज मैं
को कै संक्छ हुजूर
एक गाड़ मैं क्वे लगै .. दोस्र्यां नै . नै सक्न
किलै कि पानि क स्वभाव हुंछ हरदम अग्घा बग्न
सत्य सुनौ जस सुद्ध हुंछ जो आ्ग मैं नै जल्न
जो भैं मैं नै सड़्न् अर .. पानि मैं लै नै गल्न
भो्ल कभ्भैं नै ऊन, दा !.. कंर्छ हमेसा पाज
अगर साम्न मैं ऊँछ त वीक नाम हुंछ आज
देवदार 