गीत : जरा :
जरा भलि कैं खिलन दे फूल खन
म्यर नजीक तू अल्लै आए झन
गनमनाटै कुबा्नि यो भलि नाहन
ओ लाटा !
तू छै अनाड़ी बेसबर
तति तौलाट लै अस्सल नै हुन
हुंछ गुलिय धीरजौ को फल सदा
जरा ध्यानै ले मेरि यो बात सुन
फैद नाहन तु कत्ती कर जतन
भलि कैं खिलन दे फूल खन
गीत : सुमन :
कती स्वानी लागन्नै है सुमन
त्यर रूपै कि खुसबू मैं मगन
म्यर दिलौ भौंर गैन्नो यो भजन ….
ओ बाना !
तू छै पुन्यू को चनरमा
हर रात जुन्याली छ तेरी
आंखा मैं रीस हिरदय मैं छिमा
हर बात निराली छ तेरी
तुई कैदे कि कस्यैं हो्ल मिलन
कती स्वानी लागन्नै है सुमन
गीत : किलै :
आंखा मैं नीन नाहन
कल्ज मैं लै थाम नाहन
त्यर अलावा ये दुनिय मैं
और के फाम नाहन
पोछि बेर आंसु मिखन
एक हंसी दिंछि किलै
प्रीत को गीत सुनैबेर
खुसी दिंछि किलै
के लगै काम नाहन
जिंदगी को नाम नाहन
त्यर अलावा ये दुनिय मैं
और के फाम नाहन
गीत :: त्यर अलावा ::
दिन मैं लै चैन नाहन
रात मैं एैराम नाहन
त्यर अलावा ये दुनिय मैं
और के काम नाहन
आज कस भौ कि हरिय
दूब कूस जसि लागन्नै
त्यर बिना रात जुन्याली
अमूस जसि लागन्नै
के लगै पत्त नाहन
क्वे लगै पैगाम नाहन
त्यर अलावा ये दुनिय मैं
और के काम नाहन
यो पहाड़ौ क पानी बगन्नौ छ
कांई नदियौं मैं कांई नहरौं मैं
ठुलि गाड़ है ऐबेर पुजन्नौ छ
यां गांवों मैं वां सहरौं मैं
डान कान मैं जब लै पड़ंछ हियूं
जड़ि बूटि बनस्पति खनिज भिजूं
वीले पानी अमरित बनि जां
गाड़ौ मैं और गध्येरौं मैं
ये पानि मैं क्वे गनगी न मिला
बरबाद न कर नालि मैं न बगा
थ्वड़ भौते लापरवाही ले
जीवन जल बदलौं जहरौं मैं
कि कई जौ कि के कै बेर लगै फैद नाहन
और अब बिन कई रै बेर लगै फैद नाहन
जैक इ्रंसाफा तराजू मैं बाट हुंछ रिष्वत
वीक दरबार मैं जै बेर लगै फैद नाहन
बानरौ सुंगरौ को् राज चलन्नौ गौं मैं
गड़ा मैं साग लगै बेर लगै फैद नाहन
रात दिन कुड़ कबाड़ गंदगी मिलनै जै मैं
आज वी गंग मैं नै बेर लगै फैद नाहन
जस्यैं आग लुकि रौं घौल मैं
जस्यैं पानि लुकि रौं नौल मैं
उस्यैं तू लै मेरी फाम मैं
जस्यैं ध्वां लुकि रौं हौल मैं
द्यख्न चान्नै त्यर रूपै की
एक झलक यो रात जुन्याली
ल्यख्न चान्नै त्यर रंगै की
एक गजल यो फूलै डाली
जस्यैं ढुंग घुरकनीं रौल मैं
जस्यैं काण फरकनीं सौल मैं
उस्यैं तू लै मेरी फाम मैं
जस्यैं ध्वां लुकि रौं हौल मैं
देवदार 