गीत : मेरि जां :
को छै तू तू छै कां मन हेर्नो यां वां
जो छै तू तू छै जां तू ई छै मेरि जां
जब उठि जां तब नीन जै उंछी
जब से जां तब नीन नि उनी
नरै तेरी बेसुध कर दिंछि त
फेर मकैं के फाम नि रूनी
के है जां ये मन मां के लै पत्त नहां
जो छै तू तू छै जां तू ई छै मेरि जां
फूलौं मैं छ तेरी रंगत
तारौं मैं छ तेरी माया
ये हा्व मैं छ तेरी खुस्बू
पानी मैं छ तेरी छाया
जां लै चां तू छै वां कसि हैगे दुनियां
जो छै तू तू छै जां तू ई छै मेरि जां
गजल : इंतजारी :
अन्या्र मैं दी जलैबेर इंतजारी करनयूं सूआ
मगर ये तेज हा्व मैं दी निमै जा्ल डरनयूं सूआ
आंखा है आंस छलकि जानीं जसिक चैमास मैं पानी
उई मैं डुबिनयूं सूआ उई मैं तरनयूं सूआ
जो् देखनीं सोचनीं चुपचाप लागि रै काम मैं अक्सर
उनूं के पत कि कसिकैं जी रयूं या मरनयूं सूआ
तुमर हर काम पुर है जौ तुमरि यात्रा सफल है जौ
सबै द्याप्तान का खूटान मैं ख्वर धरनयूं सूआ
लड़ै छू जिंदगी ये जितण हूं तलवार नै चैनी
हिरदै मैं प्रेम लीबेर मी अघिल कै सरनयूं सूआ
गीत : काईं :
क्वे त पुछि बेर बता
गंत करि बेर देखा
डागडर हूं पुछा
बैद ज्यू हन बो्ला
रोग कस लागि गौ
ना दवै ना जतन
कांई उई त नै
है गयो रे मिहन
हर बखत
हर घड़ी
हर पहर
लागि रै एक लगन
मन उई मैं मगन
उई छ म्यर अपन
जसिक राधा किसन
गीत : हमार पहाड़ :
यांक उंचा निचा डाना गध्यार गाड़
कति भला लागनीं यो हमार पहाड़
बांजाक बन को ठण्डो पानी
हरिय चुर्यालू प्यांलि खुमानी
काल किरमोड़ा लाल बुरांस
कफु लंपुछिया घुघुति हिलांस
गौं है इसटेसन दूर बजार टाड़
कति भला लागनीं यो हमार पहाड़
तलि है मलि तक नान ठुला गड़
सिडि़ जस लागनीं एक दगड़
बन मैं काफल भिड़ मैं पांगर
ढुंगै कि कुडि़ अर छत मैं पाथर
गोठा मली चाख कमरा वी मली भाड़
कति भला लागनीं यो हमार पहाड़
गीत : घुंघरू :
काइ्र्रं बडि़ दूर बटै उन्नै
कान मैं क्याप कून्नै
माठू माठू
ब्वझ लादि बेर
धार का बाट मैं
धीरे धीरे हिटन्या
खच्चरौं की
गरदन मैं लटक्या
हौले हौले बाजन्या
ठुला ठुला पितला का घुंघरू की
घण्टि जसि टन टन
माठू माठू
गीत : कफुआ :
गौं घरा का मांगान मैं
कफुआ बासणौ
कफुआ कूणौ नि काटा
नाना नाना रुख
इनै रुख बढि़ बेर
द्यल तुमूं सुख
रुखान का हांगान मैं
कफुआ बासणौ
कफुआ कूणौ कि रुखा
सबै कि पराणी
पात खानीं गोरु बाछ
नानतिना दाणी
हांगान का फांगान मैं
कफुआ बासणौ
गीत : माठू माठू :
काईं है
चुड़ा जसि छन छन
सुननौ मेरो मन
माठू माठू
आज त हाव का
खुट मैं बाजनै
पैजेब खुसबू की
गाड़ौ को पानी लै सुन्नौ
वीखन रूकी रूकी
मनचल भौंर
करन्यान
फूलौं मली गनमन
माठू माठू
गीत : नि काटा :
नि काटा नि काटा भांगी गौं घरा का रूख
काट्या रुख देखिबेर हुंछ बड़ो दूख
रुखान मैं चड़ी चड़ा रौनीं दिन रात
गोरु बाछा खानीं येक कौंल कौंल पात
घाम मैं मिलौं सबौ कैं इनूं तली सूख
नि काटा नि काटा भांगी गौं घरा का रूख
इन हमर खाना लिजी फल म्याव दिनीं
सबौं का पराना लिजी ताजी हाव दिनीं
बनकाटि चाइ सुखौं रूखनौं को मूख
काट्या रुख देखिबेर हुंछ बड़ो दूख
भजन : श्रद्धा :
नौर्ता मैं वां म्यल हैरौ बल
मैया का मंदिर मैं जान खन
भक्तौ मन चंचल हैरौ बल
चूड़ी चरयो बुंदा फुंदा
रोली चंदन फल फूल मिठै
माला चुनरी ग्वाला मिसरी
श्रद्धा पूर्वक परसाद सबै
देवी का पावन चरणौं मैं
शुभ अर्पन प्रतिपल हैरौ बल
नौर्ता मैं वां म्यल हैरौ बल
मैया का मंदिर मैं जान खन
भक्तौ मन चंचल हैरौ बल
गीत : ऐजा :
ऐजा सूआ ऐजा घर ऐजा
ऐजा ऐजा बेर न कर ऐजा
उदासी ले घांटी सुखी मुखड़ी घामै ले
हिया मेरो सुखि गयो तुमरी फामै ले
चौमासा जस झड़ बनि बेर ऐजा
ऐजा सूआ चड़ बनि बेर ऐजा
को जाणछ प्रीत तेरी को जाणछ मेरी
तेरो छ भरोसो मकैं झन करिए देरी
नजर हमेसा त्यर बाट पर ऐजा
खतम हुणौ द मेरो सबर ऐजा
देवदार 