गीत: पधान: वाद विवाद

गीत: पधान: वाद विवाद

है गईं इलक्सन सैणि मेरी जिति गै
अब बणि गयूं मि पधान

यो कसो कनक्सन सैणि तेरी जिति रै
उ इ बणलि पधान

कंट्रोलै कि दुकान है चिनि ली जाए
मड़तेल चाइंछ त ब्याउल हूं आए
बैठण हूं आए चहा पिण हूं आए
तब चल्लि मेरी दुकान
अब बणि गयूं मि पधान

तेरो अधिकार तेरी सैणिया उपार
वीक अधिकारौं पर तेरो अधिकार
कांई लगै मानण हूं नहां तैयार
ये इ लिजी तू लै मान
उ इ बणलि पधान

सैणि मेरी सिदी सादी क्वे ठगि ले लो
विक पछि कसि लगूं एतणो झमेलो
एक हाथ देलो कोई दोसरै ले लेलो
ऐ रौ खराब जमान
अब बणि गयूं मि पधान

सिद साद हुण कोई खराबी नी हुणी
सैणिया ले चलै राखी आज आधी दुणी
यां लगै उनूंकैं अब मौक दियौ मुणी
सैणी अर मैंस समान
उ इ बणलि पधान