चैता म्हैंणा:

गीत: चैता म्हैंणा:

चैता म्हैंणा फुलि गईं बुरांसि का डाना
हियू भरि उंछ अब बाट चाना चाना

राति ब्याव तेरी नरै लगूंछी घुघूती
भुली जांछ काम काज भुली जांछि बूती

गोठ जान हुंछ सुआ!पुजि जांछु छाना
हियू भरि उंछ अब बाट चाना चाना

तेरी फाम एकै काम रैगो रात दीन
पुछणिया पूछणि जब के लै नै कईन

उनूंकैं जवाब दिनीं आंखा डबडबाना
हियू भरि उंछ अब बाट चाना चाना

चैता म्हैंणा फुलि गईं बुरांसि का डाना
हियू भरि उंछ अब बाट चाना चाना