गीत: नाहन :
दिन मैं लै चैन नाहन रात मैं आराम नाहन
त्यर अलावा ये दुनीं मैं और के काम नाहन
आंखा मैं नीन नाहन कल्ज मैं लै थाम नाहन
त्यर अलावा ये दुनीं मैं और के काम नाहन
आज कस भै कि हरिय दूब कूस जसि लागनै
त्यर बिना रात जुन्याली अमूस जसि लागनै
के लगै पत्त नाहन क्वे लगै पैगाम नाहन
त्यर अलावा ये दुनीं मैं और के काम नाहन
पोछि बेर आंसु मिखन एक हंसी दिंछि किलै
प्रीत को गीत सुणै बेर खुसी दिंछि किलै
चाख मैं बूति नाहन गोठ मैं के काम नाहन
त्यर अलावा ये दुनीं मैं और के काम नाहन
देवदार 