याद :

गीत: याद:

नानछनै कि मकैं गौं घरै कि मकैं
याद उंछि मकैं कभैं कभ्भैं मकैं

बासि र्वाटा दगड़ छांस ताजो पिबेर
जाछ्यां इसकूल हम आप्नी पाटी लिबेर
लेखनै कि मकैं पढ़नै कि मकैं
याद उंछि मकैं कभैं कभ्भैं मकैं

चिम्ड़ गूड़ा दगड़ दूध ताजो पिबेर
जाछ्यां हम ग्वाला जब आप्न गोरु बाछ लिबेर
काफलै कि कभैं किरमड़ै कि कभैं
याद उंछि मकैं कभैं कभ्भैं मकैं

ब्रेड मक्खन दगड़ आज काॅफी पिबेर
जानूं आॅफीस हम आप्न टीफन लिबेर
लेटुए कि कभैं डूपकै कि कभैं
याद उंछि मकैं कभैं कभ्भैं मकैं